Li Amûdê gel li dijî êrîşan bû yek û tevlî seferberiyê bû

2026-01-22 16:37:19


	 

	NAVENDA NÛÇEYAN - Hêzên siyasî, meclîsên herêmî û eşîrên li Amûdê ragihandin ku ew tevlî seferberiya giştî dibin.

	 

	Li ser banga seferberiya giştî ya ku Rêveberiya Xweser û QSD’ê ji bo parastina herêmê ji êrişên çeteyên hikumeta demkî ragihandiye, Meclisa PYD’ê ya bajarê Amûdê, Meclisa bajarê Amûdê û eşîra Deqorî ya Amûdê daxuyanî dan. Di daxuyaniyê de tevlêbûna xwe ya seferberiya giştî ragihand.

	 

	Endamên Meclisa PYD’ê ya bajarê Amûdê hatin gel hev û daxuyaniyek da. Daxuyanî ji pêşiya avahiya partî ji aliyê rêvebera partiyê Nîroz Elî ve hat xwendin.

	 

	Rêveber û endamên Meclisa Bajarê Amûdê jî daxuyaniyek li pêşiya avahiya xwe dan. Endamê meclisê Ebduselam Qafûr daxuyanî xwend. Eşîra Deqûrî jî bi amadebûna ciwan û rûspiyên eşîran daxuyaniyek li pêşiya Jina Azad da. Daxuyanî ji aliyê Amir Deqorî ve hat xwendin.

	 

	Di daxuyaniyan de êrişên hikumeta demkî yên li ser Rojava hatin şermezarkirin û hate diyarkirin ku êriş bi armanca şikandina îradey gelê Kurd û jiholê rakirina destkeftiyên wan e.

	 

	Di daxuyaniyê de piştgiriya bi QSD’ê ra hat nîşandin û bang li hêzên navneteweyî û rêxistinên hiqûqî hat kirin ku erkên xwe bi cih bînin û dawî li êrişan bînin.

	 

	Her wiha bang li gelê herêmê hat kirin ku li hemberî êrişan berxwedanê xurttir bikin û hate gotin "Îradeya gel ji alava şer a dijmin bihêztir e.” Di heman demê de banga xurtkirina hevgirtinê li gelê Kurd hat kirin.

	 

	Di dawiyê de dirûşmên "Bijî berxwedana Rojava" hatin berzkirin.