2 gerîlayên cenazeyê wan ji Kilyosê hatin girtin, bi girseyî hatin veşartin 

2026-09-22 13:35:31


	 

	ÇEWLÎG - Cenazeyên gerîlayên YJA-Starê Zehra Kîsaoglû û Sûheyla Kaya ku ji goristana Kilyosê hatin wergirtin, li Kanîreşê bi dirûşmeyên "Şehîd namirin" hatin veşartin.

	 

	Cenazeyên gerîlayên YJA-Starê Zehra Kisaoglu (Raperîn) û Suheyla Kaya (Zîlan) ku ji Goristana Xerzanê ya Bedlîsê hatin derxistin û li Kilyosê li ser rê hatin veşartin, duh piştî hevberkirina DNA'yê radestî malbatên wan hatin kirin. Cenazeyên her du gerîlayan li navçeya Kanîreş a Çewlîgê hatin veşartin.

	 

	Cenaze bi girseyeke mezin hatin pêşwazîkirin

	 

	Cenazeyên Zehra Kisaoglu û Suheyla Kaya ku ji Stenbolê hatibûn anîn, li gundê Çatak ê navçeya Kanîreşê bi girseyeke mezin hatin pêşwazîkirin û dû re ber bi gundên Karga Pazar û Hasan Ova ve birin ku li wir bên veşartin.

	 

	Bi dirûşmeyên 'Şehîd namirin' hatin veşartin

	 

	Pêşî, cenazeyê Suheyla Kaya birin mala malbata wê li gundê Karga Pazar û dû re birin goristana gund. Li goristanê, tabûta Suheyla Kaya, li ser milên jinan hate hilgirtin û di nav dirûşmeyên "Şehîd namirin" de hate veşartin.

	 

	Cenazeyê Zehra Kisaoglu li goristana bajaroka Çîro Jor a li gundê Hasan Ova hate veşartin, li wir jinan tabûta wê li ser milên xwe hilgirtin û bi dirûşmeya "Şehîd namirin" hate veşartin. Ji bo kesên ku di têkoşîna azadiyê de jiyana xwe ji dest dane, deqeyekê rêz hat girtin. 

	 

	Merasîmên sersaxiyê yên li gundên Karga Pazar û Hasan Ova hatin lidarxistin, dê sê rojan bidomin.