‘Xoverdayîşê cinîyanê kurdan sîstemê camêrdî serobin kerd’ 2026-01-23 10:51:28   STENBOL - Îdarekara MYK’yê DBP’yî Fatma Yenî derheqê averşîyayîşê Sûrîye de qisey kerd û va ganî prosesê muzakereyî dewam bikero û azadîya fîzîkî ya Rayberê Şarê Kurdî Abdullah Ocalanî bêro caardiş.   Çeteyê HTŞ’yî 6ê çeleyî de hêrişê taxanê Şêxmeqsûd û Eşrefîye yê Helebî kerdî û hêrişî nika herêmê binan ê îdareyê xoserî yê Rojawanî de dewam kenê. Cinîyê ke hemverê çeteyan de xoverdayîş kenê, demê hêrişan de îşkence bedenê înan rê yeno kerdiş. Îdarekara Buroyê Partîya Herêmanê Demokratîkan (DBP) ê Marmarayî Fatma Yenî derheqê babete de qisey kerd û da zanayîş ke cinî Rojawan de xo ver danê û wina va: “Xoverdayîşê cinîyanê kurdan sîstemê çimsûr ê camêrdî serobin kerdo.”   ‘Cinîyê kurdî ver bi azadîye rayîrşîyayîş kerdî’   Fatma Yenî reaksîyon vera hêrişê HTŞ’yî yê hemverê Şêxmeqsûd û Eşrefîye mojna û va: “Cinîyê kurdî ver bi azadîye rayîr ra şî. No goreyê hesabê modernîteyê kapîtalîst nêame. Cinîyê kurdî şarê Rojawanî rê cuyayîşêke têduşt awan kerdî. Labelê çeteyê çimsûr ê HTŞ’yî û çeteyanê Tirkîya dir hêrişê uca kerdî. Rojawan de şar pê dir hemverê DAIŞî têkoşîn domna. Destkewtişê kurdan wina asan nînê veradayîş.”   ‘Destkewtişê Kobanî bî sebebê heyfgirewtişî’   Fatma Yenî averşîyayîşê Sûrîye ercnayîş kerd û va hêrişê HTŞ û çeteyê girêdayeyê ci berardişê zihniyetê serdestî yo û wina dewam kerd: “Şarê kurdî Rojawan de xoverdayîş mojna. Xoverdayîşê cinîyan sîstemê serdestî yê camêrdî serobin kerd. Çeteyê HTŞ’yî bedenê cinîyan hedef girewt û îşkence tutan rê kerd. Hêrişê hemverê şaran sewîyeya merdimîye derbas kerd. Destkewtişê Kobanê bî sebebê heyfgirewtişî.”   ‘Proses tehlukeyê de yo’   Fatma Yenî bale ant serê prosesê ke Abdullah Ocalan da destpêkerdiş û wina ercnayîş kerd: “Rayber Abdullah Ocalan zanyarek o ke hemverê modernîteyê kapîtalîstî sere nêtewêneno. Fikrê Abdullah Ocalan yewine fikro ke merdimîye xelas keno. Birêz Ocalan roşn o. Proses nika tehlukeyê de yo. Yewine hêzo ke vernîya şerî de yeno domnayene Abdullah Ocalan o. Paradîgmaya demokratîk û azadîwaze ya. Na paradîgma senîn Kobanî û Rojawan de bi ser kewte do her çar parçeyê Kurdistanî de zî bi ser kewa.”   Waştiş   Fatma Yenî peynîya qiseykerdişê xo de waştişê xo rêz kerd û va: “Ma venga Komara Tirkîya kenê. Ma şarê kurdî hetê şerî nîyê. Ma wazenê cuyayîşêke azad û têduşt bêro caardiş û ziwanê kurdkî bibo ziwanê fermî. Waştişê ma dewamkerdişê prosesî yo. Wa heqê hêvîye bêro caardiş.”