‘Hêrişî dewamê komployê 15ê Sibate yê’ 2026-01-23 11:34:43   Rozerîn Gultekîn   WAN - Endama TJK-E’yî Kezban Dogan da zanayîş ke hêrişê hemverê Rojawanî dewamê komployê 15ê Sibate yo û va, do hemverê hêrişan heme partîyê sîyasî yê Ewropayê dir pêvînayîşan bikerê û wina va: “Nika tewr zêde lazimîya kurdan bi yewîya neteweyî est a. Yewîya neteweyî semedo ke qirkerdişî nêrê kerdişî ya, dimayê ke qirkerdişî bêrê kerdişî nîya.”   Hêrişê çeteyê HTŞ’yî yê girêdayeyê Hukmatê Demkî yê Sûrîye ke 6ê çeleyî de hemverê taxanê Şêxmeqsûd û Eşrefîye yê Helebî dest pêkerdî dewam kenê. Her çar parçeyê Kurdistan û Ewropa de xoverdayîşê hemverê hêrişan dewam kenê. Endama Têgêrayîşê Cinîyanê Kurdan ê Ewropa (TJK-E) Kezban Dogan derheqê hêriş û xebatanê TJK-E’yî yê hemverê hêrişan de qisey kerd.   ‘Dewamê komployê 15ê Sibate’   Kezban Dogan da zanayîş ke hêrişê 6ê çeleyî tenya hemverê kurdanê Rojawanî nîyo, hemverê heme kurd û erjê merdimîye yo û va: “Rayber Apo pêvînayîşan de vano, ‘Rojawan xeta min a sûr a’. Rojawan xeta sûre ma hemine ya. Rojawan de paradîgmaya azadîya cinî û ekolojîk kerd cuye. Cuya teberê modernîteyê kapîtalîstî nîşan da. Na rewşe planê hêzê serdestî zî xira kerd. Hemverê nê hukmatê HTŞ’yî ame weçînayîş. Colanî tayîn kerdî. Colanî NATO’yî de xalîya sûrî ser o ame pêşwazîkerdiş. Dewleta tirkan prosesê aştîye her tim taloq kerd. Komployê 15ê Sibate çi yo 4ê çeleyî 2026ine zî dewamê ci yo. Labelê çîyêk xo vîr ra kerdî. Xoverdayîş û têkoşînê şarê kurdî xo vîr ra kerdî.”   ‘Roşnayîya ke Arîn Mîrkan awan kerd hedef gênê’   Kezban Dogan dîyar kerd ke azadîya cinîya kurde ke semedê dinya bîye hêvî hedef ameya girewtiş û hêrişê cinîyan ser o tesaduf nîyo. Kezban Dogan na babete wina ard ziwan: “DAIŞ ewilî cinîyan hedef girewt. Hemverê nê de bi felsefeya cinî cuye azadî xoverdayîş est bî. Hêzê koalîsyonê hemverê DAIŞî hêriş nêkerdî. Xoverdayîşî de taxêke mend. Na taxe ra roşnayî dinya rê vila bî. Bi xêrê kamî? Bi xêrê Arîn Mîrkanan. Nika zî roşnayîya ke Arîn Mîrkan awan kerd hedef yena girewtiş. A ke hedef yena girewtiş paradîgmaya demokratîkî ya Abdullah Ocalan ya.”   ‘Yewîya neteweyî ferz a’   Kezban Dogan bale ant serê yewîya neteweyî û wina va: “Serra 2012ine ra hêrişî hemverê Rojawanî de dewam kenê. Kurdan bi ruhê seferberîye cewab da. Xoverdayîşê girdî kerdî. Kurdan dir ruhê xoverdayîşî est o. Labelê nê bi têgêrayîşê azadîye rêxistin bî. Kurdî yew sloganî de yenê têhet û vanê; ‘Rojawan, Rojhelat, Kurdistan yew welat o’. Sînorî ameyê xêzkerdiş la felsefeya Rayber Apo nê sînoran wedarna. Labelê çi heyf semedê na yewîye vejîyo orte ganî kardî bireso este. Lazimîya Kurdan nika tewr zêde bi yewîya neteweyî est a. Ganî lez yewîya neteweyî bêro îlankerdiş. Nika lazimî bi yewîtya neteweyî est a, dimayê nê qirkerdişî.”   Do pêvînayîşan bikerê   Kezban Dogan wina peynîya qiseykerdişê xo ard: “Ma sey têgêrayîşê cinîyananê kurdan ê Ewropayî 10ê çeleyî ra seferberî îlankerd. Semedê pawitişê Rojawanî ma do her cayî de çalakî bikerê. Ma bi platformê cinîyan, enternasyonalîst, femînîst, sosyalîst û komê ‘defeng Rojava’ wareyan de yê. Sere de dîplomasîya şarî ma çalakîyê pratîk bikerê. Semedê pêvînayîşanê partîyê sîyasî yê welatê Ewropayî dir zî serdayîşê ma dest pêkerdî. Ma do partîyê sîyasî yê Ewropayî dir pêvînayîşan bikerê.”