Dayîkê Şemeyî aqûbetê Hasan Gulunay persa 2026-07-04 15:01:44   STENBOL - Dayîkê Şemeyî hewteyê 1110ine de aqûbetê Hasan Gulunayî yo ke 20ê Temmuze 1992yan de amebi vînîkerdiş, persayî.   Dayîk/Merdimê Şemeyî bi waştişê “Ganî vînîbîyayeyî bêrê vînayîş, kiştoxî bêrê muhakemekerdiş” hewteyê 1110ine de Meydanê Galatasarayî yê Stenbolî de çalakîya xo ya hewteyine pê ardî. Dayîkê Şemeyî, endam û îdarekarê ÎHD’yê Stenbolî, Dayîkê Aşitîye û zafê pawîtoxê heqê merdiman tewrê çalakîye bîyî. Çalakîye de resmê vînîbîyayeyan ameyî berzkerdiş. No hewte de aqûbetê Hasan Gulunayî yo ke 34 serrî 20ê Temmuze 1992yine de amebi vînîkerdiş, ame persayîş.   Metnê eşkerayîye Merdimanê Şemeyî Jiyan Kaya wend.   Jiyan Kaya ard ziwan ke Alî Ekber Atmaca 23yê Gulana serra 1992ine de Artvîn de ame destbendkerdiş, bi îşkence ame kiştiş û wina behsê dewamê aqûbetê Hasan Gulunayî kerd: “Serê Alî Ekber Atmacayî de ehlîyetê Hasan Gulunayî vejîya. Hasanî semedê ehlîyetê xo îlanê vînîbîyayîşî dabi. Nê semedî ra polîsan dest bi cîgêrayîşê pîyê 4 domanan Hasan Gulunayî kerd. 20ê Temmuze serra 1992ine de Hasan semedê xebate banê xo yê Tarabyayî vejyîya û êdî anêgêra banê xo. Kesêk cayê xebate yê Hasanî gerîya û va ‘o şubeyê têkoşînê vera terorî ra geyreno û Hasan ame destbendkerdiş.’ Labelê pêwa muracatanê keyeyî zî cewabê ‘Hasan nêameyo destbendkerdiş’ înan rê ame dayene. Dimayê ci Keyeyê Gulunayî îdarekarê Emnîyetê Stenbolî Huseyîn Kocadagî dir pêvînayîşî pê ardî. Huseyîn Kocadagî keyeyî re va; Hasan Gulunay destbendkerde yo, weş û war o. Dimayê ke bedenê ey de rêçê îşkenceyî şêrê, do bêro veradayîş. Kesê bi nameyê E.Ç. zî Hasan Gulunay Emnîyetê Stenbolî de dîbi. Hasan Gulunayî E.Ç. re vato ‘Ez Hasan Gulunay a, wazenê mi destbendkerde vînî bikerê.’ Kesê bi nameyê H.K. zî dîyar kerdibi ke o 19ê Temmuze serra 1992ine de ameyo destbendkerdiş û bi rojan îşkence de mendo. Polîsan H.K. re vato ‘Ma Hasan Gulunay kişt, nika dore ya to ya.”   Pênîyê qiseykerdişê xo de Jiyan Kaya ard ziwan ke keyeyî muracaatê Serekwezîrî, Wezaretê Karê Zereyî û temamê sazîyanê pênasekerdişî kerdê û wina ci de şîye: “Wezaretê Karê Zereyî Nahît Menteşî Meclîs de cewab da pêşnîyazpersî û va ‘Nê temamê îdîayê propagandayê rêxistinanê terorî yê. Hêzê ma sey her wextî semedê yewbîyayîşê dewlete xebitîyenê.’ Dadgeha Destûra Bingehîn (DDB) 21ê Nîsana serra 2016ine de qeraro ke ‘cipersayîşêk weş nêameyo rayraberdene’ daye. Labelê aqûbetê Hasan Gulunayî nêame eşkerakerdiş. Ma vînîkerdişê serra 34ine yê Hasan Gulunayî de venga selahîyetdaranê dewlete kenê. Ganî dewlete berpirsiyarîyê xo bîyaro caardene. Çend serrî derbaz bibê zî, ma do aqûbetê kesê vînîbîyayeyan bipersê.”   Çalakî bi tewrkerdişê qerenfîlanê Meydanê Galatasarayî pêynî bî.