STENBOL - Endama MYK’a ÎHD’ê Gulseren Yolerî bale ant ser astengîyanê vernîya mendişê aştîye û va, ganî cimatê sivîlî xetê sûrî derbas bikero û têkoşînê hempar de bêrê têhet. Gulseren Yolerî ard ziwan ke polîtîkaya zextî ya dewlete hêvîya aştîye qels kerda.

 

Sûrîye û Rojawan de qirkerdişê HTŞ’yî hemverê kurd û elewîyan de dewam kenê. Semedê nê qirkerdişî vinderê û aştî bêro caardiş rolê sazgehê cimatê sivîlî zaf muhîm o. Endama Heyetê Îdareyî ya Merkezî ya Komeleya Heqê Merdiman (ÎHD) Gulseren Yolerî rolê sazgehê cimatê sivîlî prosesê aştîye de ercnayîş kerd.

 

Muhîmîyê cimatê sivîlî

 

Gulseren Yolerî dîyar kerd ke ganî agahîyê rast biresê cimatî û hêzê têkoşînê cimatî û nê ser o zî hewceyî bi rêxistinbîyayîşêk têkoşînê girdî est o. Gulseren Yolerî eşkera kerd ke armancê Forumê Cimatê Sivîlî o yo ke çîyê yenê waştiş bêro kerdiş somut bikero û wina va: “Ganî hukmê vernî bişikinê û cuyayîşêke hembeş bêro awankerdiş. Semedê nê zî Forumê Cimatê Sivîlî muhîm o. Wareyê sivîlî de û wareyê demokratîkî de zî hin xetê sûrî est ê. Nînan ra yew zî babeta kurdî yo. Babeta bawerî yew na ya. Xeylêk rêxistinê demokratîkî demo ke nê babetî benê babeta qiseykerdişî xo danê het û pasîf manenê. Labelê demo ke ma qalê aştîya cimatî kenê ganî ewil nê hukmê vernî bêrê şikinayîş. Ganî xetê sûrî bêrê derbaskerdiş û hemparî bêro kerdiş.”

 

‘Mecbûr ê nê gaman bierzê’

 

Gulseren Yolerî eşkera kerd ke semedê fikrê aştîya cimatî bêro caardiş ganî dewlete gaman bierzo û derheqê helwestê dewlete yê babeta prosesî de zî wina va: “Destpêk ra ma prosesî de çîyê negatîfî dî. Demo ke derheqê aştîye de vatişê tewr bêmunaqeşe yenê vatene, propaganda yan zî bi endamîya terorî yenê sucdarkerdiş. Hîn rêxistinê demokratîkî têkiliyê înan bi terorî dayî ro û cipersayîş înan rê ame akerdiş. Ameyî tepiştiş ceza înan rê ame birnayîş. Hema zî danê. Ma behsê aştîye kenê labelê hîna merdimî, rojnamegerî, akademîsyenî yenê tepiştiş. Polîtîkayê ke aştîye tehdîd kenê newe ra yenê viraştiş. Rojawan û Sûrîye de hemverê kurdan û elewîyan hêrişê cidî est ê.”

 

Venga semedê cimatî

 

Gulseren Yolerî eşkera kerd ke semedê proses peynî nêbo venga cimatê sivîlî û rêxistinê demokratîk û heme cimatî kerdî ke vajê ‘şima nêeşkenê nê prosesî biqedênê’ û wina dergî da: “Ma venga pêro kesî kenê ke vajê ganî nê prosesî bidomnê. Ma nêeşkenê aştîye vatişêk hukmatî ra verdê. Semedê nê ganî ma têkoşîn bikerê. No însiyatîfê dewlete nîyo.”