Evîn Çîftçî

 

OSMANIYE - Dayîka Mehmet Yavuzelî ke bodrumê Cizîrî de ame qetilkerdiş, Hanim Yavuzel wina va: “Ma wazenê serekê ma azad bibo, tu tepişteyanê sîyasî zîndanan de nêmanê û aştî bibo. Ganî dewlete gamanê somutî bierzo.”

 

Qezaya Cizîrî ya Şirnexî de 7ê çeleyê 2015ine de qedexeyê vejîyayîşî ame îlankerdîş û 79 rojî dewam kerd. 7ê sibata 2016ine de 100yî ra zêdeyêr kesanê ke hîrê awanîyanê bodruman de asê mendî ameyî qetilkerdiş. Yew nê kesanê ke ame qetilkerdiş endamê Meclîsê Partîyî (PM) yê Partîya Herêmanê Demokratîkî (DBP) Mehmet Yavuzel bî.

 

Dayîka Mehmet Yavuzelî, Hanim Yavuzel derheqê prosesê Aştî û Cimatê Demokratîkî de ercnayîş kerd.

 

‘11 serrê mi yê peyêne sey cehenemî yo’

 

Hanim Yavuzel eşkera kerd ke 11 serrê aye yê peyêne sey adirê cehenemî vîyartî û wina va: “Ez Pirsûs de ameya dinya, dima ma bar kerd Osmaniye. Ez zewicîya ancî ma agêrayî Pirsûs. Ma 10 serrî Riha de mendî. Cuye zehmet bî. Ma hêga ser sey karker xebate kerdêne. Firset sînordar bî.

 

Semedê bêfirsetîye ma ancî yew rey ameyî Osmaniye. Ma semedê xebate ameyî û uca mendî. La pêwa her çî zî cuya ma weş bî. No 11 serrî yo cuya mi sey cehenemî ya.”

 

Nîjadperestî peynî nêbî

 

Hanim Yavuzel wina dewam kerd: “Semedê problemanê ekonomî ma ameyî nê bajarî la tîya de bêtêduştî û nîjadperestî zêde bî. Ma çîyêk nêkerdêne la çi heyf ê her rey nîjadperestî kerdêne. Ma Tirkîya de ciwîyênê la nasnameyê ma û ziwanê ma kurdî bî.”

 

‘Mevajê birîndar vajê şehîd’

 

Hanim Yavuzel qiseykerdişê xo wina dewam kerd: “Tewr peyêne semedê xebatanê weçînitişî şî Şirnex. Va do di rojî bimano û bêro. Her rey şîyêne mi nêeşkayîne vajî meşo. Serê sibayî rawuşt kewt wesayît. Mi va ‘Mi meveşne’. Ewnîya mi û nîşaneyê serkewtişî kerd û şi. A roja ra dima ancî nêagêrîya. Rojêk telefon ame va ‘lajê to birîndar o’. Mi zî va mevajê ‘birîndar vajê şehîd o’. Ez şîya herêmê ke ê uca bî. La polîsî û leşkerî vernîya ma girewtî. Ez di kîlometreyan bi lingê viran vazdaya. Mi va ez lajê xo uca ra vejena. La nêverdayî. Lajê mi zaf zana bi, wayîrê hişmendî bi. Semedê şarê xo xo ver da. Bodruman de ame qetilkerdiş.”

 

‘Ganî dewlete game bierzo’

 

Hanim Yavuzel bale ant prosesê aştîye û wina dewam kerd: “Verê zî vatêne aştî, la çend reyan xerab kerd. Xo bibo aştî bêro kerdiş. Serekê ma azad bîne. Tepişteyî bêrê veradayîş. Ma dewlete ra gamanê somutî wazenê.“