WAN - Dewaya ke vera Rojnameger Reyhan Hacioglu ameya akerdiş de, 4 serrî û 2 aşmî cezaya zîndanî ci rê ameye birnayîş.

 

Rojnameger Reyhan Hacioglu, 17ê çeleyê 2025an de bi sereştişê keyeyî, sey beşêkê cigêrayîşêk ke Stenbol de amebî destpêkerdiş, ameye destbendkerdiş. Reyhane, 20ê çeleyî de bi sebebe “endamîya rêxistine” ameye tepiştene û 13yê Hezîrane de ameye veradayîş.

 

Roniştişê peyên ê dewaya vera Reyhan Hacioglu, Dadgeha Cezaya Giran a 2yin a Wanî de pê ame. Reyhan Hacioglu tewrê roniştişî nêbî; avûkatê aye û temsîlkarê rêxistinanê cimatê sivîlî yê bajarî, dadgehe de amade bîyî.

 

Dimayê wendişê ewnîyayîşê dozgerî ke seba “endamîya rêxistine” ceza waştêne, avûkatan pawitişê xo pêşkêş kerd. Avûkat Resul Temur dîyar kerd ke meslegê rojnamegerîye na dewa de yeno muhakemekerdiş û seba muwekîla xo waştişê beraetî kerd. Dimayê pawitişan heyetê dadgehe qerarê xo eşkera kerd. Dadgehe bi sebebe “hetkarî û hewênayîşê rêxistine” 4 serrî û 2 aşmî cezaya zîndanî da Reyhan Hacioglu û qerar da ke kontrolê dadwerî bi hawayê qedexeyê vejîyayîşê teberê welatî, dewam bikero.