MERKEZÊ XEBERAN - HRANAyî neql kerd ke 24 saetê peyêne de 36 welatijî dinyaya xo bedelnayî û 138 kes zî birîndar bîyî.

 

Şerê Îsraîl-DYA û Îranî roja 25ine de dewam keno. Ajansê Xeberanê Çalakîkeranê Heqê Merdiman (HRANA) hedîseyê 24 saetê peyêne ser o raporêk weşan kerd.

 

Neql bî ke 24 saetê mîyanê de 20 bajarê Îranî û Rojhelatî de 279 hêrişê ameyê kerdiş. Nê hêrişan de 46 bingehê leşkerî, bingehê Pasdarê Şorişî, merkezê Besîcî, teyaregehê leşkerî, bingehê polîsan, bîrê petrolî û tesîsatê nuklearî yê binê herrî hedef girewtî.

 

Neql bî ke hêrişan de 36 welatijî dinyaya xo bedelnayî û 138 kes zî birîndar bîyî. Bajar û herêmê ke hêrîşî ser o zêde bîyî wina neql bîyî: Tehranî, Elbrozî, Îsfehanî, Bender Ebasî, Qumî, Buşehrî, Tewrêzî û Kendava Farsî.

 

Goreyê hûmaranê fermîyanê ke 28ê sibate ra, roja verêne hêrişan ra heta vizêrî ameyê arêdayîş, hezar û 443 welatijî, mîyanê înan de 217 tutî, netîceya hêrişan de dinyaya xo bedelnayî. Sewbîna neql bî ke hezar û 167 xebatkarê hukmatî û personelê leşkerî ameyî kiştiş.​​​​​​​​​​​​​​​​