STENBOL - Komîsyonê Tutan û Vîrî yê OHDyî yê Stenbolî reaksîyon hemverê destbendkerdişî, tepiştiş û îşkenceyî ke dimayê Newroze pê amebî mojna. Sekreteryayê Komîsyonê Tutan û Vîrî yê OHDyê Stenbolî Meryem Agar dîyar kerd ke dimayê Newroze ame dîyayîş ke refleksê dewleta asayîşî hema zî dewam keno. Meryem Agar va ke dewlete vindertişê aştîye sey “tehdîdê sîyasî” dî, bi seyan kesî ameyî destbendkerdiş û va: “7 tutî zîndan de yê, 2 tutî zî hepsê keyeyî de yê.”

 

Newroza 2026ine Kurdistan û zaf bajarê Tirkîya de bi tewrbîyayîşê milyonan kesan ameye pîrozkerdîş. Dimayê Newroze zaf bajaran de polîsan eşt ser keyan û bi seyan kesî bi îşkence destbendkerdî û zaf kes zî dima ra ameyî tepiştiş. Komîsyonê Tutan û Vîrî yê Şubeyê Komeleya Huqûqnasanê Semedê Azadîye (OHD) ya Stenbolî awanîya xo ya Beyogluyî de eşkerayî da û reaksîyonê hemverê destbendkerdişî, tepiştiş û îşkenceyê ke dimayê Newroze pê amebî mojna. Eşkerayî hetê sekreteryayê Komîsyonê Tutan û Vîrî yê OHDyî yê Stenbolî Meryem Agar ra ameye wendiş.

 

‘Şar meydanê Newroze de vindertişê xo yê aştîye eşkera kerd’

 

Meryem Agar ard ziwan ke Newroze tena rojêke nîya ke yena pîrozkerdîş, kultur, vîr û tarîxê şarê kurdî ya û wina qisey kerd: “Newroza 2026ine zî bi sloganê ‘Newroza Azadî’ ameye pîrozkerdiş. Milyonan kesî tewrê Newroze bîyî û vengê xo berz kerdî. Şar meydanê Newroze de vindertişê xo yê aştîye eşkera kerd. Newrozan de tu hedîse nêvejîya. La dimayê Newroze ma dî ke refleksê dewleta asayîşî hema zî dewam keno. Dewlete vindertişê aştîye sey ‘tehdîdê sîyasî’ dî û bi seyan kesî ameyî destbendkerdiş.”

 

‘7 tutî tepişte yê, 2 tutî zî hepsê keyeyî de yê’

 

Dewamê eşkerayîye de Meryem Agar dîyar kerd ke Stenbol de 15 tutî bi sebebê tewrbîyayîşê Newroze ameyî destbendkerdiş û nê çî va: “15 tutan ra 4ê înan bi sebebê ‘propagandaya rêxistine kerdî’ ameyî tepiştiş, 2 tutan rê zî qerarê hepsê keyeyî ame dayîş. Îzmîr de tutêk bi sebebê ‘Bi lewê xo hîn çî vato’, Êlih de tutêk bi sebebê ‘Sehne ser deyîre vato’, Amed de zî tutêk ame tepiştiş. Bi pêroyî 7 tutî zîndan de yê, 2 tutî zî hepsê keyeyî de yê.”

 

‘Semedê ke faîlî bivejê orte ma muracat kerd’

 

Peynîye de Meryem Agar dîyar kerd ke tepiştişê tutan hemverê huqûqî yo û va: “Ganî heqê tutan bêro pawitiş. Sucê ke tutî înan ra yenê sucdarkerdiş nînê qebulkerdiş. Tutê ke ameyî destbendkerdiş îşkence înan ser o ameyo kerdiş. Tu hawayêk îşkence nîno qebulkerdiş. Goreyê peymananê Neteweyê Yewbîyaye (NY) maddeyê 37ine de dîyar o ke îşkenceyê tutan hemverê merdimayîye yo. Ma sey OHDyî semedo ke faîlî bivejê orte muracat kerd. Ma do heta peynîye dimayê dewaya tutan de bê.“​​​​​​​​​​​​​​​​