STENBOL - Dayîkanê Aştîye ke Anqara de partîyanê sîyasîyan reyde prosesî ser o pêvînayîşî kerdî, dîyar kerdî ke seba ke proses baş rayra şoro, sererastkerdişê qanûnî û gamê somutî şert ê.

 

Dayîkanê Aştîye rojanê vîyarteyan de Anqara de partîyanê sîyasîyan reyde pêvînayîşî kerdî. Heyet de Dayîkanê Aştîye ra Behîye Yalçine, Afîfe Kartale û Muzeyyen Butune ca girewt û hetê bînî ra qiseykerdoxa DEM Partî Ayşegul Dogane û parlamentera DEM Partî ya Amedî Adalet Kaya zî dayîkan reyde bîyî. Pêvînayîşî de dayîkan waştişê xo resnayî partîyan û waştî ke seba prosesî berpirsîyarî bêro girewtene.

 

Endamê Însîyatîfê Dayîkanê Aştîye yê Stenbolî Feleknas Karabaşe, Reyhan Akgule û Bedîa Gokguze derheqê serdayîşê ke ameyo kerdene de qisey kerdî.

 

Feleknas Karabaşe da zanayene ke armancê serdayîşî waştişê aştîye bîyo û wina va: “Nê prosesî de vate û qiseykerdişê ma do seba aştîye bê. Ma seba statuya Abdullah Ocalanî têkoşîn danê. Ma wazenê ke tepişteyî bêrê veradayene. Mayê Aştîye aştîye wazenê. Ganî dewlete gamanê somutan bierzo.”

 

‘Gama somute şert a’

 

Reyhan Akgule zî dîyar kerd ke pêvînayîşê bi partîyanê sîyasîyan reyde bi armancê aştîye ameyî kerdene û wina ard ziwan: “Ma tepiştiş û mergan nêwazenê. Ma aştîye û têduştîye wazenê. Vîyarte de bedelê pîlî ameyî dayene. Dewê ma ameyî rijnayîş. Tutê ma merdî. Ganî peynî bîyero nê şîdetî. Gamê somutî şert ê. Êdî bes o. Wa tu kes ma nêxapêno.”

 

‘Ganî paştîdayîş bêro dayene’

 

Bedîa Gokguze zî wina va: “Zaf wext o waştişî yenê zanayene labelê hukmatî hîna gamêka somute nêeştîya. Seba ke proses rayra şoro ganî sererastkerdişê qanûnî bikewê cuye. Eke qanûnan nêvejê, o wext yeno manaya ke proses xitimîyayo. Ziwanê şerî yeno xebatnayene. Ziwanê ‘terorîst’ bi israr yeno xebatnayene. Ganî nê ziwanî ra bêro veradayîş. Ganî dewlete game bierzo.”