COLEMÊRG - Hemsereka Zimangeh-Derî Adîle Kutlar va ke muracatê semedê Zimangeh-Derî ke dimayê 13 serran Gever de ameye akerdiş dewam kenê û va ke nêzdîbîyayîşê hemverê ziwanî zaf muhîm o û wina va: "Lazim o ke verê ma ziwanê xo bimusê û aver berê."

 

Qezaya Geverî ya Colemêrgî de 13 serrê verî Kurdî-Der bi KHKyî ame girewtiş û dimayê 13 serran qeza de Komeleya Averberdişê Cigêrayîş û Perwerdeyê Ziwanê Kurdî (Zimangeh-Der) ame akerdiş. Komele ke verê hîrê sinifî ameyî akerdiş, muracatî dewam kenê. Hemsereka Zimangeh-Derî Adîle Kutlar derheqê muhîmîya ziwanî de qisey kerd û bale ant wayîrvecîyayîşê prosesî û va ke lazim o ke statuyê ziwanê kurdî bêro dayîş.

 

'Lazim o ke keyeyî tutanê xo dir kurdkî qisey bikerê'

 

Adîle Kutlar va ke Kurdî-Der 13 serrê verî ame girewtiş û dimayê 13 serran Zimangeh-Der ame akerdiş û va: "Ma komele 8 aşmê verî akerd. Ma hîn sinifî akerdî. Armancê ma no bî ke semedê merdimê ke wendiş û nuştişê kurdî nêzanê sinifî bêrê akerdiş. Dimayê 13 serran akerdişê komeleyî ma zaf kêfweş kerd. Zaf muhîm o ke keye bi tutanê xo dir kurdî qisey bikero. Hîn keyeyî est ê ke semedê ke tutê înan dibistane de zehmetî nêancê tirkî qisey kenê. La no şaşîyêk pîl o. Lazim o ke merdimî verê ziwanê xo qisey bikerê. Lazim o ke her kes tutanê xo dir kurdkî qisey bikero. Yan zî do ziwan vîndî bibo."

 

Muracatî dewam kenê

 

Adîle Kutlar wina dewam kerd: "Ma verê hîrê sinifî akerdî. Ma di sinifan de sewîyeya verêne qedênayî. Yê sewîyeya dîyine û yê semedê yê verêne muracatî zî dewam kenê. Esasê muracatan de ma dest bi dersan kenê. Ziwan bîyayîşê merdiman o. Lazim o ke her kes wayîrê ziwanê xo bivejîyo. Demê neweyî yê perwerdeyî dest pêkerd. Ma bi ziwanê xo perwerde wazenê. Lazim o ke kurdkî sey dersê weçînaye nêro dayîş. Lazim o ke ma wayîrê ziwanê xo bivejê."