Dayîkê Şemeyî çalakîya xo ya hewteyê 1124ine viraştî

 

STENBOL - Dayîkê Şemeyî hewteyê 1124ine de kiştoxanê Mecît Baskinî yo ke serra 1993yîne de amebi destbendkerdiş û kiştişî pers kerdî û waştî ke berpirsîyarî hesab bidê.

 

Dayîk/Merdimê Şemeyî bi waştişê “Wa vînîbîyayeyî bêrê vînayene, kiştoxî bêrê muhakamekerdiş” hewteyê 1124ine de Meydanê Galatasarayî yê Stenbolî de çalakîya xo ya hewteyî viraşte. Dayîkê Şemeyî, endam û îdarekarê ÎHDyê Stenbolî, Dayîkê Aşîtî û xeylêk pawitoxê heqanê merdiman tewrê çalakî bîyî. Çalakî de fotografê vînîbîyayeyan ameyî berzkerdiş. Çalakîya na hewteyî de kiştoxê Mecît Baskinî yo ke serra 1993ine de Anqara de amebi destbendkerdiş û kiştiş pers kerdî.

 

Metnê eşkerayîye hetê Merdimanê Şemeyî Sebla Arcan ra ame wendene.

 

‘Destbendkerdiş nêame qebûlkerdiş’

 

Sebla Arcan ard ziwan ke ewro a dosyaya Mecît Baskinî pare kenê û wina vat: “Dosyaya Mecît Baskinî polîtîkayanê bêcezaverdayîşî mojneno. Çiqas delîl û îtîrafî est bê zî dosye aver nêşîye. Mecît Baskin 42 serre û babîyê 3 tutan bi. 30ê Êlula 1993ine de Anqara de hetê polîsan ra ame destbendkerdiş. Labelê destbendkerdiş nêame qebûlkerdiş. Dimayê 3 rojan 3ê temmuze de meyîtê ey qezaya Golbaşî de ame vînayene. Bi sîleh amebi kiştene. Keye semedê raştîye vejo werte bi serran têkoşîya. Labelê cigêrayîş bi hawayêk xurt nêame rayraberdiş. Dimayê 18 serran polîsê verên Ayhan Çarkin o îtirafkar dîyar kerd ke Mecît Baskin bi waştişê Îbrahîm Şahînî ra hetê polîs Ziya Bandirmalioglû û Ayhan Akça ra ame kiştene. Serra 2014ine de Mehkemeya Cezaya Girane ya 12ine ya Anqara derheqê Mehmet Agar, İbrahim Şahîn û Korkût Ekenî zî mîyan de 19 kesan rê dewa akerde. Labelê pêwa îtîrafan zî serra 2019ine de mehkema semedê pêro versûcan qerarê beraetî da. Bi îtîrazê keyeyî qerar ame xirabkerdiş labelê serra 2024ine de reyna qerarê beraetî ame dayene. Ma vanê êdî bes o. Wa peynî polîtîkayanê bêcezaverdayîşî bêro ardiş.”

 

‘Ma fek na dewa ra vera nêdanê’

 

Dima ra kênaya Mecît Baskinî, Melek Baskin qisey kerd. Melek Baskine dîyar kerd ke 50 serrî zî derbas bê ê do têkoşîn bikerê û vat: “Hetanî ke heqîqet vejo werte ma do têkoşîn bikerê û edalet biwazê. Zerreyê Anqara de babî mi ame destbendkerdiş. Ma fek na dewa ra vera nêdanê.”

 

Çalakî bi ronayîşê qerenfîlan ê Meydanê Galatasarayî de peynî bî.