AMED - Dibistanên Werzişê yên Havînê ku Şaredariya Bajarê Mezin a Amedê ji bo zarokên di navbera 7-17 salî de bi awayekî bêpere organîze dike, dest pê kir. Di bernameyê de ku dersan di 1ê Tîrmehê de dest pê kirine, 8 hezar û 377 zarok di 15 şaxên ciyawaz de beşdarî çalakiyên werziş û perwerdeyê yên bêpere dibin.

 

Dibistanên Werzişê yên Havînê dest pê kir: 8 Hezar û 377 zarok perwerdeya bêpere distînin

Dibistanên Werzişê yên Havînê yên bêpoldar ku ji aliyê Serokatiya Daîreya Xizmetên Ciwanan û Werzişê ve bi armanca ku zarok bêhnvedana xwe ya havînê bi werziş, perwerde û çalakiyên civakî bikêrhatî derbas bikin, geşbûna wan a fîzîkî, derûnî û civakî were piştgirîkirin, çanda werzişê belav bibe û werzişkarên jêhatî di temenê biçûk de bên keşfkirin hatiye destpêkirin, rastî eleqeyeke mezin a zarokan hat. Bernameya ku piştî serlêdanên di navbera 8-26ê Hezîranê de hatin girtin, di 1ê Tîrmehê de dest pê kir û dê heta 4ê Îlonê berdewam bike.

 

Di 15 şaxan de perwerdeya bêpere

 

Di çarçoveya Dibistanên Werzişê yên Havînê de zarokên di koma temenê 7-17 salî de; di 15 şaxên ciyawaz de ku ji futbola jin û mêran, basketbol, voleybol, avjenî, atletîzm, tenîs, tenîsa ser maseyê, taekwondo, satranç, lîstikên gelêrî, hentbol, kodkirina robotîk, lîstikên hiş û zekayê û jîmnastîkê pêk tên, perwerdeya bêpoldar distînin.

 

Bi van perwerdeyan ku ji aliyê rahênerên pispor ên qadê ve tên dayîn, tê armanckirin ku ne tenê jêhatîbûna werzişî ya zarokan, her wiha ruhê tîmbûnê, dîsîplîn, xwebawerî, piştgirî û çanda bi hev re xebatê jî pêş bikeve.

 

Perwerde li 8 navendên ciyawaz berdewam dikin

 

Perwerdeyên di çarçoveya bernameyê de li van deran tên meşandin: Qada Jiyana Hevpar a Sumerparkê, Kompleksa Werzişê ya Talaytepeyê, Qada Çîmenê ya Jimare 2 ya Kompleksa Werzişê ya Seyrantepeyê, Kortên Tenîsê yên Girtî yên 75an, Qada Taxê ya Yenîkoyê, Hewza Avjeniyê ya Vekirî ya Xanîmalên Komî, Kompleksa Werzişê ya Gokkuşagiyê û Parka Kardeşlikê (Biratî).

 

Bi saya bernameya ku li xalên ciyawaz tê meşandin, tê armanckirin ku zarok ji tesîsên werzişê yên nêzî herêmên ku lê dijîn sûdê werbigirin.

 

8 hezar û 377 zarok beşdarî bernameyê bûn

 

Bi giştî 8 hezar û 377 zarokan qeyda xwe li Dibistanên Werzişê yên Havînê yên bêpoldar kir. Eleqeya herî mezin bi 2 hezar û 935 serlêdanan ji bo şaxê avjeniyê hat nîşandan. Ji bo futbola mêran hezar û 315, ji bo taekwondoyê 702, ji bo voleybolê 695 û ji bo basketbolê 470 zarokan qeyda xwe çêkir. Di şaxên din de jîmnastîkê 376, kodkirina robotîk 353, lîstikên hiş û zekayê 305, lîstikên gelêrî 268, tenîsa kortê 257, satranç 237, futbola jinan 128, tenîsa ser maseyê 88, hentbol 85 û atletîzmê 73 serlêdan girtin.

 

Armanc, piştgirîkirina geşbûna piralî ya zarokan e

 

Şaredariya Bajarê Mezin a Amedê, bi Bernameya Dibistanên Werzişê yên Havînê armanc dike ku piştgiriyê bide zarokan daku mehên havînê di hawîrdoreke ewle, saxlem û berber de derbas bikin, werziş bibe çandeke jiyanê û bingehekê ji bo gihandina werzişkarên paşerojê amade bike.