NAVENDA NÛÇEYAN – Bi boneya salvegera rizgarkirina Kobanî ya di 26'ê Çileyê de, TJA'yê tekez kir ku êrîşên li dijî jinên Kurd sîstematîk in û diyar kir ku ew ê tu carî ji têkoşîna rizgariya jinan paşve gav neavêjin.

 

Tevgera Jinên Azad (TJA) di salvegera rizgarkirina Kobanî ya di 26'ê Çileya 2015'an de daxuyaniyek nivîskî weşand. Di daxuyaniyê de hate destnîşankirin ku êrîşên li dijî jinên Kurd ne bûyerên yekane ne û hate destnîşankirin ku polîtîkayeke sîstematîk a tasfiyekirinê ya li dijî têkoşîna rizgariya jinan tê meşandin.

 

TJA'yê di daxuyaniya xwe de wiha got:

 

"Îro 12 sal di ser rizgarkirina Kobanî ya ji çeteyên DAIŞ'ê re derbas dibin. Ev serkeftin, ku di 26'ê Çileya 2014'an de bi dest ket, ne tenê bîranînek ji bo berxwedaneke berê ye; di heman demê de hişyariyek bihêz e li dijî êrîş û zordariya berdewam a li ser jinan û hemû gelên ku jiyaneke azad diparêzin. 

 

Kobanî, îro jî wek duh, sembola berxwedanê, îradeya azadiyê û têkoşîna jinan e. 

 

Êrîşên DAIŞ'ê yên li ser Kobanî ne tenê kiryarek şer a asayî ye; ew beşek ji polîtîkayeke tinekirinê ye ku tevahiya gelê Kurd hedef digire. Ev êrîş ji aliyê komên çete ve ku ji aliyê hêzên herêmî û cîhanî ve dihatin piştgirîkirin û li gorî berjewendiyên xwe tevdigeriyan, hatin kirin. Armanca sereke ew bû ku îradeya gelê Kurd a ji bo avakirina jiyaneke azad û bi rûmet bişkînin; û bi taybetî jî, veguherîna civakî ya ku di bin pêşengiya jinan de pêş diket, ji holê rakin. Ev şêwaza jiyanê, ku li ser azadiya jinan disekine, ji aliyê pergalên serdest û mêr-serdest ve nayê qebûlkirin. 

 

Lêbelê, ev plana tarî li Kobaniyê hate pûçkirin. Berxwedana ku jinên Kurd pêşengiya wê kirin, ne tenê parastina bajarekî, lê di heman demê de nîşanî cîhanê da ku jin aktorên sereke yên rêxistin, parastin û ji nû ve avakirina jiyanê ne. Jinan, bi çekên xwe, bi îradeya xwe, bi rêxistina xwe û bi hişmendiya xwe ya azadiyê, dîrok nivîsandine. Ji ber vê yekê, Kobanî ji serkeftinek leşkerî bêtir bûye yek ji sembolên gerdûnî yên têkoşîna rizgariya jinan.

 

Modela jiyana demokratîk, piralî û kolektîf a ku îro li Rojava tê avakirin, berdewamiya îradeya ku li Kobaniyê derketiye holê ye. Ev model, ku jinan dixe navendê û li ser wekhevî û jiyana hevpar a gelan ava dibe, hîn jî ji hêla zîhniyeta serdestiya mêran, yekparêz û dewleta neteweyî ve wekî metirsiya herî mezin tê dîtin. Ji ber vê sedemê, Rojava bi salan e ku hedefa êrîş û dorpêçên sîstematîk e.

 

Di êrîşên dawî de, kiryara birîna porê jineke Kurd a ku ji aliyê yek ji çeteyan ve hatiye kuştin û wek diyariyek ji hev re dayîn, nîşanek eşkere ya zîhniyeta barbar e ku laşên jinan hedef digire û bi birçîbûn, tîbûn û înkarkirinê dixwaze wan bindest bike. Porê birrîn ne 'beşek laş' e; ew bêtehamuliya li hember têkoşîna rizgariya jinan û berxwedana wan a qehremanî ye. Ev êrîş ne tesadufî ne jî tenê ne. Ew ji jinên Kurd, îradeya wan a azad, hêza wan a rêxistinkirî û pêşengtiya wan a veguherîner di civakê de ditirsin. Ji ber vê yekê, ev êrîş rasterast nasnameya jinan û mafê jiyanê hedef digirin. 

 

Wekî TJA, em bi zelalî dibêjin: Em ê tu carî li hember van êrîşên ku rasterast jinan hedef digirin paşve gav neavêjin. Rihê berxwedanê yê ku li Kobaniyê derket holê, îro li Rojava û li seranserê Kurdistanê dijî, têdikoşe û dibe çavkaniya hêviyê. Ev têkoşîn ne bîranînek ji rabirdûyê ye; ew berxwedanek jinan a zindî ye ku îro jî berdewam dike û pêşerojê ava dike.

 

Ev banga me ye ji bo hemû jinên pêşverû û azadîxwaz ên cîhanê, bi taybetî jinên Tirkiye û Rojhilata Navîn û ji bo tevahiya mirovahiyê: Em bang li we dikin ku hûn qadên azadiyê yên li Kobaniyê hatine bidestxistin biparêzin û hevgirtina xwe bi Rojava re xurt bikin. Ji ber ku her êrîşek li ser Kobaniyê êrîşek li ser pêşeroja jinên li çaraliyê cîhanê ye. Em, wek jinên Kurd, tu carî jiyaneke din qebûl nakin. Bi hemû hebûna xwe, em ê ji bo azadiyê bisekinin, jiyanê biparêzin û qet dev ji radestkirina van axan ji tariyê bernedin. Bi berxwedana xwe, bi rêxistinbûna xwe û bi baweriya xwe ya bi azadiyê, em ê avakirina pêşerojê bidomînin.

 

Jin Jiyan Azadî

 

Bijî Berxwedana Kobanê

 

Bijî Berxwedana Rojava "