Pelşîn Çetînkaya

 

AMED - Endama Merkezê Heqê Tutan a Baroyê Amedî avûkate Berîvan Zerîn derheqê hêriş û ablûqakerdişê Rojawanî de dîyar kerd ke çîyê yenê ciwîyayene çarçeweya Peymana Heqê Tutan, Peymana Cenevre û Statuyê Romayî de binpaykerdişê heq û sûcê şerî yo û wina va: “Rayîrê huqûqî girewte nîyê, hukmê gerdunî eşkeno bica bêro.”

 

Hêrişê HTŞ, DAIŞ û komê paramîlîter ê girêdayeyê Tirkîya 6ê çeleyî ra Heleb de dest pêkerdî û dima ra hemverê Rojawanî ameyî destpêkerdiş û dewam kenê. Hêrişan de şarê sivîlî yenê qetilkerdiş û heto bîn ra lazimîyê sey xida û dermanî yenê astengkerdiş. Reaksîyonê hemverê hêrişan her çar parçeyê dinya de dewam keno.

 

Endama Merkezê Heqê Tutan a Baroyê Amedî avûkate Berîvan Zerîn derheqê binpaykerdişê heqan û tutê ke serdî ra dinyaya xo bedelnenê de qisey kerd.

 

‘Peymanî ameyê binpaykerdiş’

 

Berîvan Zerîn dîyar kerd ke Rojawan de tutî serdan ra dinyaya xo bedelnenê û va no hetê huqûqê merdimîye yê mîyanneteweyî de binpaykerdişêk gird o û wina dewam kerd: “Pêrodayîşanê çekdarî de pawitişê sivîlan û tutan tuzukê esas ê. Binê şertê îşxalkerdişî de astengkerdişê lazimîye û netîceyê nê de binpaykerdişê pawitişê tutan û sivîlan nîno qebûlkerdiş. Nê çalakîyê wina, çarçeweya peymana Cenevre û protokolan de sey caardişê bêmerdimayî yenê ercnayîş. Eynî wextî de uca problemê xoresnayîşê lazimîyê cuyayîşî pronlemêk cidî yo.”

 

Berîvan Zerîn dîyar kerd ke herême de heqê cuyayîşî ameyê binpaykerdiş û astengkerdişê hetkarîya tibî, heqê weşîye, tesîrê psîkolojîk û fîzîkî tutan ser o kerdê. Berîvan Zerîn wina dewam kerd: “Hetê starbîyayîşî de tutî hawirê biasayîş, germ û weşîye ra bêpar mendî. Na rewşe hemverê Peymana Heqê Tutan ê Neteweyê Yewbîyaye ya.”

 

‘Bêvengîya mîyanneteweyî hemkarîya sûcî ya’

 

Berîvan Zerîn dewam de wina va: “Bêvengîya cimatê mîyanneteweyî munaqeşeyê huqûqî û exlaqî xo dir ardo. Demo ke sûcê şerî benê vatişê babete, berpirsyarîyê sazgehê mîyanneteweyî û dewletan est o ke vernîya nê bigirê. Labelê bêvengî û bêtesîrî sebebê rexneyê cidî benê. Bêvengî hemkarîya sûcî ya. Yê yenê ciwîyayene çarçeweya Peymana Heqê Tutan, Peymana Cenevre û Statuyê Romayî de binpaykerdişê heq û sûcê şerî yo. Rayê huqûqî girewte nîyê, hukmê gerdunî eşkeno pê bêro.”